ईन्डियन प्रिमियर लिग क्रिकेट (आईपीएल) टी-ट्वान्टी क्रिकेट अन्तर्गत आज रोयल च्यालेन्जर बैंलोर र पञ्जाब किंग्सबीच प्रतिस्पर्धा हुँदैछ ।
गएराति सम्पन्न भएकाे खेलमा दिल्ली क्यापिटल्सले कोलकत्ता नाइट राईडर्सलाई ७ विकेटले पराजित गरेकाे छ । अहमदाबादमा कोलकत्ताले दिएको १५५ रनको लक्ष्य दिल्लीले १६ ओभर ३ बलमा मात्र ३ विकेट गुमाएर पूरा गर्यो ।
दिल्लीको जितमा पृथ्वी शले ८२ रनको अर्धशतकीय इनिङ्स खेले । उनले ४१ बलमा ११ चौका र ३ छक्का प्रहार गरे । यस्तै शिखर धवनले ४६ रन बनाए । कप्तान ऋषव पन्त १६ रनमा आउट भए ।
कोलकत्ताका पाट कुमिन्सले ३ विकेट लिए । यस अघि टस हारेर पहिले ब्याटिङ गरेको कोलकत्ताले २० ओभरमा ६ विकेट गुमाएर १५४ रन बनाएको थियो ।
कोलकत्ताका लागि आन्द्रे रसेलले अविजित रहदै सर्वाधिक ४५ रन बनाए । सुबमन गिलले ४३ रन जोड्दा पाट कुमिन्स ११ रनमा अविजित रहे । यस्तै राहुल त्रिपाठीले १९, नितिश रानाले १५ र दिनेश कार्तिकले १४ रन बनाए ।
कप्तान इयान मोर्गन र सुनिल नारिन सुन्य रनमा आउट भए । दिल्लीका अक्षर पटेल र ललित यादवले २/२ विकेट लिए ।
जितसँगै दिल्लीले ७ खेलमा १० अंक जोड्दै दोस्राे स्थानमा उक्लिएकाे छ । कोलकत्ता यो पाँचौ हार हो । पाँचौ स्थानको कोलकत्ताले ७ खेलमा ४ अंक जोडेको छ ।
