काठमाडौं । राष्ट्रिय महिला लिग फुटबलअन्तर्गत सोमबार भएको खेलमा सशस्त्र प्रहरी बलको एपीएफ क्लबकी सावित्रा भण्डारी एक्लैले १२ गोल गरेकी छन् ।
भण्डारीको एक दर्जन गोलको मद्दतमा एपीएफ क्लबले उदयपुरको चौदण्डीगढी नगरपालिकालाई २२–० गोल अन्तरले पराजित गर्यो । ललितपुरको सातदोवाटोस्थित एन्फा कम्प्लेक्समा हिजो भएको खेलमा एपीएफले लगातार छैटौँ जीत हात पारेको हो ।
एपीएफका लागि भण्डारीले मध्यान्तरअघिको खेलमा हाफमा पाँच तथा मध्यान्तरपछि सात गोल गर्नुभएको हो । भण्डारीले खेलको पाँचौँ, ३२औँ, ३३औँ, ३४औँ, ३८औँ, ४७औँ, ५५औँ, ६२औँ, ६३औँ, ७२औँ, ७९औँ मिनेट तथा दोस्रो हाफको इन्जुरी समयमा गोल गरेकी हुन् । उनले यसअघिका तीन खेलमा ह्याट्रिक गोल गरेकी थिइन् ।
यस्तै एपीएफका लागि अनु लामाले पाँच, अनिता बस्नेतले तीन तथा सरु लिम्बु र रेनुका नगरकोटीले एक–एक गोल गरेकी थिइन् । लिगको शीर्ष स्थानमा रहेको एपिएफको ६ खेलमा १८ अङ्क रहेको छ । चौदण्डीगढी अङ्कविहीन रहँदै लिगको पुछारमा रहेको छ ।
