इन्डियन प्रिमियर लिग (आइपिएल) टी-२० क्रिकेटको १३ औं संस्करणमा सहभागी भएर नेपाली राष्ट्रिय टिमका सदस्य सन्दीप लामिछाने स्वदेश फर्किएका छन् ।
दिल्ली क्यापिटल्समा आवद्ध भएका आज (सन्दीप) बिहीबार बिहान नेपाल आइपुगेका हुन् । युएईमा भएको आइपिएलमा दिल्लीले फाइनलसम्म पुग्दा १७ खेल खेल्दा सन्दीपले एक खेल पनि खेल्न पाएनन् ।
यसैबीच, बिहीबार स्वदेश फर्किएका सन्दीपले सामाजिक सञ्जालमा ट्विटरमा एक ट्विट गरेका छन् । उनले लेखेका छन्, ‘कथा सकिएको छैन, विस्तारै सुरु हुँदै छ।’
कथा सकिएको छैन, बिस्तारै सुरु हुदै छ।👊
— Sandeep Lamichhane (@Sandeep25) November 12, 2020
सन्दीपले आइपिएलमा एक खेल खेल्न नपाए पनि आफ्नो खेल जीवन नसकिएको बरु सुरुवात भइरहेकोतर्फ (ट्विटमार्फत) संकेत गरेको बुझ्न सकिन्छ ।
आइपिएलको यस सिजनमा दिल्लीले सन्दीपलाई एक खेल पनि खेल्न दिएन । क्यारेबियन प्रिमियर लिग (सिपिएल) मा राम्रो प्रदर्शन गरेका उनले आइपिएलमा मौका नपाउँदा थुप्रै ट्विट गरिरहेका छन् ।
बिहीबार स्वदेश फर्किएका सन्दीप करिब तीन साताको नेपाल बसाइपछि बिग बास लिग (बिबिएल) खेल्न अष्ट्रेलिया जाँदै छन् ।
उनले खेल्ने टोलीको टुङ्गो केही दिनमा लाग्ने सन्दीपको व्यवस्थापन हेर्दै आएका रमन शिवाकोटीले जानकारी दिए । बिबिएल डिसेम्बर १० देखि सुरु हुँदैछ ।
