युएईमा जारी १३ औं संस्करणको इन्डियन प्रिमियर लिग (आईपीएल) टी-ट्वान्टी क्रिकेटमा आज दिल्ली क्यापिटल्स र सनराइजर्स हैदराबादबीच प्रतिस्पर्धा हुँदैछ ।
आईपीएलको ११औँ खेलमा आज दिल्ली र सनराइजर्स हैदरावाद भिड्न लागेका हुन् । खेल, साँझ पौने ८ बजे आवुधावीस्थित शेखजायद स्टेडियममा हुनेछ ।
श्रेयस एयरको कप्तानीमा मैदान उत्रने दिल्लीले पहिलो खेलमा किङ्स इलाभेन पन्जाबलाई सुपर ओभरमा हराएको थियो । दोस्रो खेलमा दिल्लीले चेन्नई सुपर किङ्सलाई ४४ रनले हराएको थियो ।
हैदराबाद दिल्लीलाई हराएर पहिलो जित निकाल्न चाहन्छ । डेभिड वार्नरको कप्तानीमा रहेको हैदराबादले अघिल्ला दुई खेल गुमाएको थियो । पहिलो खेलमा हैदराबाद रोयल च्यालेन्जर्स बैंगलोरसँग १० रनले पराजित भएको थियो । यस्तै दोस्रो खेलमा हैदराबाद कोलकत्ता नाइट राइडर्ससँग ७ विकेटले पराजित भएको थियो ।
दिल्ली अंकतालिकाको शीर्ष स्थानमा रहँदा हैदरावाद पुछारमा छ । यसअघिका दुवै खेलमा मौका नपाएका नेपाली स्पिनर सन्दीप लामिछाने आजको खेलमा पनि सुरुवाती ११ मा पर्ने सम्भावना कम छ । दिल्लीमा २ भारतीय स्पिनर भएका कारणसन्दीप विकल्पको रुपमा मात्रै रहँदै आएका छन् ।
सन्दीपले पहिलो संस्करणमा ३ र दोस्रो सिजनमा ६ खेलमा मौका पाएका थिए ।
