स्पेनिस ला लिगा क्लब रियल मड्रिडका फरवार्ड ग्यारेथ बेल आफ्नो पुरानो क्लब टोटनह्याम फर्किने संघारमा पुगेका छन् । दुई क्लबबिच बेलका सम्बन्धमा वार्ता भइरहेको छ । बेललाई ल्याउन पुरोना क्लब टोटनह्याम इच्छुक देखिएको छ ।

सन् २०१३ मा त्यो बेलाको कीर्तिमानी मूल्यमा स्पेनिस क्लब गएका ३१ वर्षका बेलले रियल मड्रिडका लागि १०० भन्दा धेरै गोल गरेका छन् र चारपटक च्याम्पियन्स लिगको उपाधि उचालेका छन् ।

बेलका एजेन्ट जोनथन बार्नेटले बेलका सम्बन्धमा भइरहेको वार्ता सकारात्मक दिशामा रहेको बताएका छन् । उनले यसअघि नै भएका थिए, ‘बेल अझै पनि टोटनह्यामलाई माया गर्छन् । उनी हुन चाहेको क्लब नै टोटनह्याम हो ।’

प्रशिक्षक जोसे मोरिन्हो पनि बेललाई ल्याउन इच्छुक छन् । तर उनले सार्वजनिक रुपमा यसबारे केही कुरा गर्न चाहेका छैनन् ।