लेग स्पिनर सन्दीप लामिछानेको उत्कृष्ट प्रर्दशनका बाबजुत जमैका तलावाज क्यारेबियन प्रिमियर लिग (सिपिएल) टि-२० को लिग चरणको अन्तिम खेलमा पराजित भएको छ ।
आइतबार राति लिग चरणको आफ्नो अन्तिम खेलमा जमैका सेन्ट लुसिया जोउक्ससँग ११ रनले पराजित भएको हो ।
टस जितेर ब्याटिङ रोजेको लुसियाले ६ विकेट गुमाएर १४५ रन बनाएको थियो भने तलावाज पूरा ओभर खेलेर १३४ रनमै समेटिएको थियो । खेलमा सन्दीपले एक विकेट लिएका थिए ।
सन्दीपले समूह चरणका १० खेलमा १२ विकेट लिइसकेका छन् ।
यसैबीच, जमैका तलावाजले सेमिफाइनलमा अपराजित टिम ट्रिनबागो नाइट राइडर्ससँग खेल्ने भएको छ ।
जमैका तलावाज १० खेलमा तीन जित, एक बाराबरी र ६ हारका साथ सेमिफाइनलमा प्रवेश गरेको हो भने ट्रिबागो १० खेलमै जित निकालेर शीर्ष स्थानमा रहँदै सेमिफाइनल पुगेको हो ।
राउन्ड रोबिनको दुवै खेलमा ट्रिबागोले तलावाजलाई पराजित गरेको थियो । ट्रिबागोसँग पहिलो खेलमा ७ विकेटले हार बेहोरेको तलावाज दोस्रो खेलमा १९ रनले पराजित भएको थियो ।
जमैका तलावाजले अब पहिलो सेमिफाइनलमा भोलि (मंगलबार) ट्रिबागो नाइट राइडर्ससँग प्रतिस्पर्धा गर्नेछ ।
