एजेन्सी । ब्राजिलियन स्टार खेलाडी फिलिपे कौटिन्होले आफू बार्सिलोना फर्कन चाहेको बताएका छन् । सन् २०१९ मा बार्सिलोनाबाट लोनमा जर्मन क्लब गएका कौटिन्होले पुनः बार्सिलोना फर्कने बताएका छन् ।
पछिल्लो समय बायर्नका लागि उत्कृष्ट प्रदर्शन गर्दै आएका कौटिन्होले यो सिजन बायर्नका लागि च्याम्पियन लिगको उपाधि जित्न महत्त्वपूर्ण योगदान गरेका थिए । उनले वायर्नका लागि सेमिफाइनल खेलमा बार्सिलोनाविरुद्ध दुई गोल गरेका थिए ।
जुन खेलमा बार्सिलोनाले ८-२ गोलको लजास्पद हार व्यहोर्नुपरेको थियो । गत सिजन बार्सिलोनाले उनलाई क्लबका लागि उत्कृष्ट प्रदर्शन गर्न नसकेको भन्दै बायर्नमा लोनमा पठाएको थियो । च्याम्पियन बायर्नको जितपछि बोल्दै कौटिन्होले अब बार्सिलोनामा फिर्ता हुन चाहेको बताएका छन् ।
“अब बायर्नको यात्रालाई मैले बिट मार्नुपर्छ । छिटै बार्सिलोना फर्कन चाहन्छु । बार्सिलोना फर्किसकेपछि हेरौं कस्तो अवस्था आउँछ । अहिलेको टिमको अवस्था हेर्दा मलाई फर्कन आग्रह आएको छ । छिटै बार्सिलोना फर्कनेछु,” कौटिन्होले भने ।
