एजेन्सी । लेजेन्ड्स वर्ल्ड क्रिकेट सिरिजमा दक्षिण अफ्रिकाले जित हासिल गरेको छ । लेजेन्ड्सले वेस्टइन्डिज लेजेन्ड्समाथि सानदार जित अफ्रिकाले हासिल गरेको हो ।
मुम्बईमा बुधबार राति भएको खेलमा दक्षिण अफ्रिकाले वेस्टइन्डिजलाई ६ विकेटले हरायो । दक्षिण अफ्रिकाको जितमा कप्तान जोन्टी रोड्स र अल्बी मोर्केलले उत्कृष्ट प्रदर्शन गरे ।
एक सय ४४ रनको विजयी लक्ष्य पछ्याएको दक्षिण अफ्रिकाले १८.३ ओभरमा चार विकेटको क्षतिमा लक्ष्य भेट्टाएको थियो । दक्षिण अफ्रिकालाई जिताउन जोन्टीले अविजित ५३ र मोर्केल अविजित ५४ रन बनाए । वेस्ट इन्डिजका टिनो बेस्टले दुई विकेट लिए ।
यसअघि टस हारेर पहिले ब्याटिङ गरेको वेस्ट इन्डिजले निर्धारित २० ओभरमा आठ विकेटको क्षतिमा एक सय ४३ रन बनाएको थियो । वेस्ट इन्डिजका लागि डारेन गंगाले सर्वाधिक ३१ रन बनाए ।
रिकार्डो पावेलले ३०, कार्ल हुपरले २३ र शिवनाराण चन्द्रपलले २१ रन बनाए । दक्षिण अफ्रिकाका पल हरिसले तीन तथा एल्बी मोर्केलले दुई विकेट लिए ।
दक्षिण अफ्रिकाले अर्को खेल शुक्रबार श्रीलंकासँग खेल्नेछ ।
