कार्लोस टेभेचले अन्त्यतिर गोल गरेपछि बोका जुनियर्सले अर्जेन्टिनी लिग फुटबलको उपाधि जितेको छ । जिम्नासिया वाई इजरिमा ला प्लेटाविरुद्धको अन्तिम खेलमा टेभेचले निर्णायक गोल गरे । उपाधि जित्न बोका जुनियर्सका लागि कुनै हालतमा खेल जित्नुपर्ने बाध्यता थियो ।
यस जितसँगै २३ खेलबाट ४८ अंक बटुलेर बोका जुनियर्स च्याम्पियन भयो । ४७ अंक बटुलेको रिभर प्लेट दोस्रो भयो । यसअघि रिभर प्लेट एथलेटिको टुकुम्यानविरुद्ध १–१ गोलको बराबरीमा रोकिएको थियो ।
टेभेचले ७२ औं मिनेटमा २० यार्ड परबाट गरेको प्रहार गोलमा परिणत भएको थियो ।
म्याराडोनालाई किस
खेल सुरु हुनअघि टेभेचले जिम्नासियाका प्रशिक्षक डिएगो म्याराडोनालाई किस गरेका थिए । विपक्षी प्रशिक्षकलाई किस गर्नुको कारण खुलाउँदै टेभेचले भनेका छन्, ‘ म भाग्यको खोजीमा थिएँ । उनलाई किस गरेपछि भाग्य खुलेको छ ।’
म्याराडोनाको प्रशिक्षणमा टेभेचले सन् २०१० को विश्वकप खेलेका थिए । उनी म्याराडोनालाई आफ्नो आदर्श मान्छन् । धेरैले टेभेचलाई कुनै समय म्याराडोनाको वास्तविक उत्तराधिकारी समेत भनेका थिए ।
टेभेचले बोका जुनियर्सका उपाध्यक्ष तथा अर्जेन्टिनाका पूर्व मिडफिल्डर जुवान रोमन रिक्वुल्मीको पनि प्रशंशा गरेका छन् । ‘रोमनले मलाई पुरानै अवस्थामा फर्काउन ठूलो सहयोग गरेका छन् । यो सम्मानका उनी ठूलो हकदार हुन्,’ टेभेचले भने ।
उत्कृष्ट सिजन
म्यानचेस्टर युनाइटेड, म्यानचेस्टर सिटी तथा युभेन्टस्का पूर्व स्टार टेभेचले यस सिजन १७ लिग खेलमा ९ गोल गरेका छन् । टेभेचले सन् २००१ मा १६ वर्षको उमेरमा बोका जुनियर्सबाटै आफ्नो व्यवसाहिक करियर थालेका थिए ।
त्यसपछि ब्राजिली हुँदै उनी युरोपेली लिगमा जमे । सन् २०१५ मा बोका जुनियर्स फर्किएका टेभेच २०१७ मा छोटो समय चीनियाँ क्लब साङघाई सेन्हुवामा आबद्ध भए । ३६ वर्षका टेभेचको बोका जुनियर्ससँगको सम्झौत यसै सिजनको अन्त्यमा समाप्त हुँदैछ ।
