काठमाडौं । एसीसी इस्टर्न रिजन पुरुष टी–२० कप क्रिकेट अन्तर्गत नेपाल र सिंगापुरबीचको खेल रद्द भएको छ । खेल रद्द भएसँगै दुवै टोलीले अंक बाँडेका छन् । दुबै टोलीले १–१ अंक पाएका छन् ।
थाइल्याण्डको बैंककस्थित टेर्डथाई क्रिकेट मैदानमा वर्षाको कारण नेपाल र सिंगापुरबीचको खेल रद्द भएको हो ।
बैंककमा बिहिबार राति परेको वर्षाले मैदान खेल्न योग्य नभएपछि खेल टस समेत नभई रद्द गरिएको हो ।
प्रतियोगितामा सिंगापुरले यसअघि नै लगातार तीन खेल जितेर शीर्ष दुईमा स्थान पक्का गर्दै एसिया कप क्वालिफायरमा समेत स्थान सुरक्षित गरिसकेको छ ।
उपाधि जित्ने लक्ष्य सहित थाइल्याण्ड गएको नेपाल भने शुरुवाती दुई खेलमा हार बेहोरेपछि लक्ष्य पूरा गर्न असफल भएको छ ।
नेपाल मलेसिया र हङकङसँग पराजित भएको थियो । थाइल्याण्डमाथि भने नेपालले जित निकालेको थियो ।
आजै मलेसिया र हङकङबीच अर्को खेल हुँदैछ । उक्त खेलको विजता पनि एसिया कप क्वालिफायरमा छनोट हुनेछ ।
