झापा ११ छैटौं माइभ्याली गोल्डकपको पहिलो खेलबाटै बाहिरिएको छ । इलाममा जारी प्रतियोगितामा शनिबार भारतको मानेभञ्ज्याङ एफसी दार्जिलिङसँग २–१ ले पराजित भएको हो ।
मानेभञ्ज्याङ भने सेमिफाइनल पुगेको छ। उसले सेमिफाइनलमा रुपन्देही ११ र लिग च्याम्पियन सानमिगल मछिन्द्र क्लबवीचको विजेतासँग प्रतिस्पर्धा गर्नेछ । ठूलो टुँडिखेलमा भएको खेलको २३ औ मिनेटमा मानेभञ्ज्याङ पिनसाई लाथोङले गोल गर्दै अग्रता लिएका थिए।
लाथोङले ४८ औं मिनेटमा अर्को गोल थपे । खेलको ८४ औं मिनेटमा सरोज कार्कीले गोल गरेपनि झापा खेलमा फर्कन सकेन ।
झापा ११ ले यसअघि दुई पटक माइभ्याली कपको उपाधि जितिसकेको छ । म्यान अफ दि म्याच बनेका मानेभन्ज्याङका लाथोङले १० हजार रुपैयाँ प्राप्त गरे ।
लिग च्याम्पियन मछिन्द्रसहित ए डिभिजनका ३ क्लब त्रिभुवन आर्मी क्लब, संकटाको सहभागिता रहेको प्रतियोगितामा १० टोलीको सहभागिता छ । फागुन २४ गते सम्म चल्ने गोल्डकपको विजेताले ८ लाख र दोस्रो हुने टोलीले ५ लाख रुपैयाँ प्राप्त गर्नेछ ।
