नेपाली लेगस्पिनर सन्दीप लामिछानेले टी–२० क्रिकेटमा एक सय विकेट पूरा गर्दै नयाँ रेकर्ड बनाएका छन् । थाइल्याण्डमा जारी एसीसी इस्टर्न रिजन टी–२० क्रिकेट प्रतियोगितामा सन्दीपले मलेसियासँगको खेलमा विकेट लिँदै टी–२० क्रिकेटमा एक सय विकेट पूरा गरेका हुन् ।
एक सय विकेट लिएसँगै सन्दीप टी–२० मा एक सय विकेट लिने पहिलो नेपाली बलरसमेत बनेका छन् । उनले राष्ट्रिय टोली र अन्तर्रा्ष्ट्रिय फ्रेन्जाइज लिगबाट यस ऐतिहासिक उपलब्धि हाँसिल गरेका हुन् । सन्दीपले ७५ खेलमा सय विकेट पूरा गरेका हुन् ।
सन्दीपले सन् २०१८ को इन्डियन प्रिमियर लिग (आइपिएल) मा ५ विकेट लिएका थिए । त्यस्तै सन् २०१८ मा भएको क्यारेबिन प्रिमियर लिगमा ७ विकेट, अफगानिस्तान प्रिमियर लिगमा २ विकेट लिएका थिए । उनले २०१८ र १९ मा भएको बिग ब्यास लिगको ८ खेलमा ११ विकेट लिएका थिए ।
त्यस्तै बंगलादेश प्रिमियर लिगमा ४ विकेट, पाकिस्तान सुपर लिगमा ११ विकेट, आइपिएल २०१९ मा ८ विकेट, क्यनरेबिन प्रिमियर लिग २०१९ मा ८ विकेट लिएका थिए। उनले नेपाली राष्ट्रिय टोलीबाट ३१ विकेट लिएका छन् ।
सन्दीपको उत्कृष्ट प्रर्दशनका बीच एसीसी इस्टर्न रिजन पुरुष टी–ट्वान्टी कप क्रिकेटको पहिलो खेलमा नेपाल पराजित भएको छ ।
थाइल्याण्डको बैंकक शनिबार भएको पहिलो खेलमा नेपाल मलेसियासँग २२ रनले पराजित भएको हो । मलेसियाले दिएको १ सय ५५ रनको लक्ष्यसहित जवाफी ब्याटिङ गरेको नेपालले १९ ओभर ४ बलमा अलआउट हुँदै १ सय ३२ रन मात्र बनाउन सक्यो ।
अब नेपालले आइतबार हङकङसँग खेल्नेछ ।
