एजेन्सी । साविक विजेता बार्सिलोना स्पेनिस ला लिगा फुटबलको शीर्ष स्थानमा उक्लिएको छ ।
शनिबार भएको खेलमा इबरलाई ५–० गोल अन्तरले पराजित गर्दै बार्सिलोना शीर्ष स्थानमा पुगेको हो ।
घरेलु मैदानमा बार्सिलोनाका लागि कप्तान लियोनल मेस्सीले चार गोल गरे । यस्तै अर्थरले एक गोल गरे ।
मेस्सीले पहिलो हाफमै ह्याट्रिक गरेका थिए । खेलको १४ औं, ३७ औं र ४० औं मिनेटमा मेस्सलीले बललाई जाली चुमाएका थिए । मेस्सीको यो करियरको ४८ औं ह्याट्रिक हो ।
दोस्रो हाफको ८७ औं मिनेटमा मेस्सीले व्यक्तिगत चौथो गोल गरे ।
त्यसपछि खेलको ८९ औं मिनेटमा अर्थरले गोल गर्दै बार्सिलोनालाई ५–० को जित दिलाए ।
जितसँगै बार्सिलोनाले २५ खेलबाट ५५ अंक जोडेको छ। रियल मड्रिडलाई दुई अंकले पछि पार्दै बार्सिलोना शीर्ष स्थानमा उक्लिएको हो ।
इबर २४ अंकसहित लिगको १६ औं स्थानमा छ ।
