काठमाडौं । ब्याटिङ चल्न नसक्दा नेपालले ओमानसँग १८ रनको हार व्यहोरेको छ। त्रिवि क्रिकेट मैदान कीर्तिपुरमा बुधबार भएको त्रिकोणात्मक आइसिसी क्रिकेट लिग–२ सिरिजको उद्घाटन खेलमा नेपाल पराजित भएको हो। सिरिजमा नेपालसहित अमेरिका र ओमान रहेका छन्।
टस जितेर फिल्डिङ रोजेको नेपाललाई ओमानले १९८ रनको लक्ष्य दिएको थियो। तर, नेपाल ४६।५ ओभरमा १७९ रनमै समेटियो। नेपालका प्रारम्भिक ब्याट्स्म्यान सस्तैमा समेटिएपछि लक्ष्य भेट्टाउन गाह्रो भएको हो । ओपनरद्वय कप्तान ज्ञानेन्द्र मल्ल र पारस खड्का लगातार आउट भएका थिए । नेपालका लागि भरोसा ठानिएका पारस र ज्ञानेन्द्र ३ रनमै पेभिलियन फर्किए।
नेपालका लागि तेस्रा क्रममा ब्याटिङ गर्न आएका शरद भेषवाकरले सम्हालिएर खेल्दै अर्धशतक बनाए। उनले ५ चौकाको मद्दतमा ५५ रन बनाए । त्यस्तै उपकप्तान दीपेन्द्रसिंह ऐरीले २ छक्का र ५ चौकाको मद्दतमा ३६ रन जोडे । उनले शरदसँग ६२ रनको साझेदारी गरे। यसैगरी, नेपालका लागि सन्दीप लामिछानेले आक्रामक ब्याटिङ गर्दै २७ बलमा २८ रन बनाए। उनले १ छक्का र ३ चौकाको यागदान दिए ।
यसअघि ब्याटिङ गरेको ओमानले निर्धारित ५० ओभरमा ९ विकेट गुमाउँदै १९७ रन बनाएको थियो । ओमानका लागि महम्मद नदीमले नटआउट ६९ रन जोडे। त्यस्तै, सन्दीप गौडले ३३ तथा नसिम खुशीले २८ रन जोडे।
नेपालका लागि करण केसीले ४ विकेट लिए । ९ ओभर बलिङ गरेका उनले ४७ रन खर्चिए । त्यस्तै, एक दिवसीयमा डेब्यू गरेका सुशन भारीले ३ विकेट हात पारे।
