सन् २०२२ मा कतारमा हुने फिफा विश्वकप फुटबलको छनोटका लागि नेपाली टिम आज चाइनिज ताइपेइसँग भिड्दै छ ।
ताइपेई मुन्सिपालिटी स्टेडियममा हुने खेलमा नेपालले अंक जोड्ने प्रयासमा हुनेछ । नेपालले पहिलो खेलमा कुवेतसँग लज्जास्पद हार व्यहोरेको थियो ।
नेपालले मैत्रीपूर्ण खेलमा ताइपेइलाई १–१ गोलको बराबरी रोकेकोले जित्न सकिनेमा नेपाली खेलाडीको विश्वास छ ।
नेपाली टिमका कप्तान किरण चेम्जोङले ताइपेइविरुद्ध उत्कृष्ट खेल खेल्ने दृढता व्यक्त गरेका छन् । तयारी राम्रो गर्न नपाए पनि खेलाडीहरुले राम्रो खेल्ने र नतिजा पनि राम्रो आउनेमा आफू ढुक्क रहेको उनले बताए ।
कुवेतसँगको पहिलो खेलमा नेपालले ७–० ले पराजित भएको थियो । फिफा वरियतामा ताइपेइ १ सय २५औं स्थानमा रहँदा नेपाल १ सय ६६ औ स्थानमा छ ।
