लिबियाको राजधानी त्रिपोलीमा दुई प्रमुख सशस्त्र समूहबीच भिडन्त हुदा २७ जनाको ज्यान गएको छ । त्रिपोलीस्थित आपत्कालीन चिकित्सा केन्द्रका अनुसार भिडन्तमा एक सयभन्दा बढी घाइते भएका छन् । सन् २०११ कर्णेल मौमर गद्दाफीलाई अपदस्थ गरेपछि सत्ताका लागि सङ्घर्षरत प्रभावशाली ४४४ ब्रिगेड र अल–रदा बीचको भिडन्त सोमबार राति देखिनै शुरु भएको हो । प्रत्यक्षदर्शीका अनुसार दुवै पक्षबीचको द्वन्द्व अझै जारी रहेको छ । 

भिडन्तमा ज्यान गुमाउने दुवै समूहका कार्यकर्ता हुन् वा तीमध्ये केही सर्वसाधारण नागरिक पनि थिए भन्नेबारेमा अझै खुल्न सकेको छैन । मृतक एवम् घाइतेको अवस्था पनि केन्द्रले खुलाएको छैन । त्रिपोलीलाई आधार बनाएर मानवीय सहयोगका काम गरिरहेको रेडक्रिसेन्ट सोसाइटीले पनि एएफपीलाई कुनै सूचना दिन अस्वीकार गरेको छ ।