अमेरिकाका एक कुख्यात सिरियल किलरको मृत्यु भएको छ । ७७ वर्षीय रोड्नी अल्कालाको क्यालिफोर्निया स्टेट प्रिजन नजिकै रहेको एक अस्पतालमा उपचारको क्रममा शनिबार बिहान मृत्यु भएको हो ।
क्यालिफोर्निया राज्यमा १२ वर्षीया बालिकाको साथै अन्य चार महिलाको हत्या गरेको आरोपमा रोड्नी अल्कालाले मृत्युदण्डको सजाय पाएका थिए ।
अमेरिकाको एक टिभी शो 'द डेटिङ गेम'मा भाग लिएका कारण ‘डेटिङ गेम किलर’ भनेर पनि चिनिने अल्कालालाई सन् २०१० मा सजाय सुनाइएको थियो । क्यालिफोर्नियाका साथै न्यूयोर्कमा पनि उनले अन्य दुई जना महिलाको हत्या गरेको स्वीकार गरेका थिए ।
अल्कालालाई सन् १९८० मा १२ वर्षीया रोबिन सामसोइको अपहरण र हत्याको आरोपमा पहिलोपटक मृत्यु दण्डको सजाय सुनाइएको थियो । तर, क्यालिफोर्नियाको सर्वोच्च अदालतले उक्त फैसलालाई उल्टाउँदै नयाँ सुनुवाइ सुरु गरेको थियो । उनले दोस्रो सुनुवाइमा पनि सोही सजाय पाए । तर, सन् २००३ मा फेरि त्यो उल्टिएको थियो ।
त्यसपछिको अनुसन्धानमा क्यालिफोर्नियामा अल्कालाले थप महिलाहरूको हत्या गरेको खुलासा भएको थियो । सन् २०१० को सुनुवाइमा अल्कालाले सामसोइसहित सन् १९७७ देखि १९७९ को बीचमा १८ देखि ३२ वर्ष उमेरका थप चार जना महिलाको हत्या गरेको अभियोग लगाइएको थियो ।
सन् १९७८ मा अल्कालाले अमेरिकी टेलिभिजन शो 'द डेटिङ गेम'मा पनि भाग लिएका थिए । सन् २०१२ मा उनीमाथि न्यूयोर्कमा थप २ जना महिलाको हत्या गरेको अभियोगमा २५ वर्ष जेल सजाय सुनाइएको थियो ।
