हाइटीका राष्ट्रपति जोभिनल मोइसको हत्यामा २८ जना व्यक्ति संलग्न भएको प्रहरीले जनाएको छ । त्यसमध्ये २६ जना कोलम्बिया तथा २ जना भने हाइटी अमेरिकी हत्यारा रहेको बताइएको छ ।
ती मध्ये ३ जनाको प्रहरीको गोली लागेर मृत्यु भएको छ । यद्यपि बुधबार प्रहरीले चार जनाको मृत्यु भएको पुष्टि गरेको थियो । हत्यारा र प्रहरीबीचको भिडन्त भने जारी रहेको अन्तराष्ट्रिय सञ्चार माध्यमहरुले ले जनाएका छन् ।
हाइटी प्रहरीका निर्देशक लियोन चार्लस्ले १५ कोलम्बियाली र दुई हाईटियन अमेरिकीलाई पक्राउ गरेको बताए । तीन कोलम्बियाली मारिएका छन् भने आठ अझै फरार छन् । चार्लसका अनुसार हत्याराहरू यस घटना पश्चात भागिरहेको समयमा प्रहरीले उनीहरुलाई घेरेको थियो ।
त्यसबेलादेखि दुवै पक्षबाट गोलीबारी भइरहेको बताइएको छ । बुधबार बिहान करिब ५ बजेतिर भारी हतियारधारी हत्याराहरूले हाइटीको राजधानी पोर्ट–ओ–प्रिन्सस्थित राष्ट्रपति भवनमा तोडफोड गर्दै ५३ वर्षीय राष्ट्रपति जोभिनल मोइस र उनकी पत्नी मार्टिना मोइसलाई गोली प्रहार गरेका थिए ।
१२ वटा गोली लागेका राष्ट्रपति मोइसको घटनास्थलमै मृत्यु भएको थियो । उनकी श्रीमती भने गम्भीर घाइते भएकी थिइन् । उनको उपचार भइरहेको र अवस्था स्थिर रहेको बताइएको छ । राष्ट्रपतिका तीन सन्तानहरु भने सुरक्षित ठाउँमा रहेको बताइएको छ ।
