इराकको राजधानी बग्दादस्थित अमेरिकी दूतावसमा रकेट र ड्रोन बम आक्रमण भएको छ ।
बिहीबार अमेरिकी दूतावसमा तीन वटा रकेट र ड्रोन बम आक्रमण भएको इराकी सेनाले पुष्टि गरेको खबर एएफपीले उल्लेख गरेको छ ।
पछिल्लो २४ घण्टामा अमेरिकी दूतावास लक्षित आक्रमणहरु भइरहेको बताइएको छ ।
तर सबै आक्रमणको प्रयास दूतावासको एन्टी मिसाइल प्रणालीले असफल बनाइदिएको समाचारमा उल्लेख छ ।
दूतावासमा मात्र नभएर ग्रिन जोन क्षेत्रमा पनि आक्रमण भएको छ । आक्रमण कसले गरेको भन्ने बारमो भने केही खुलाइएको छैन ।
तर इरानको समर्थन प्राप्त लडाकुहरुले यो आक्रमण गरेको अनुमान छ ।
इरान र अमेरिकाबीच युरेनियम प्रशोधनको विषयमा विवाद छ । गतवर्ष अमेरिकाले इरानकी सैन्य कमाण्डर कासिम सुलेमानीलाई आतंकवादी भन्दै ड्रोन आक्रमणमार्फत हत्या गरेको थियो ।
इराकमा २५ सय अमेरिकी सेना तैनाथ छन् । उनीहरुमाथि यसवर्ष हालसम्म ५० पटकभन्दा बढी आक्रमण भइसकेको बिबिसीले जनाएको छ ।
