ढाका । बंगलादेशमा कोरोना दोस्रो लहरलाई नियन्त्रण गर्ने नीति अन्तर्गत एशियाली यस मुलुकले बेलायतलगायत युरोपेली देशबाट आएका यात्रीहरूलाई दुई हप्ता अलग बस्नुपर्ने घोषणा गरेको छ ।
बंगलादेशको नागरिक उड्ययन प्राधिकरण (सीएएबी) ले सरकारी निर्देशन अनुसार मंगलबार विदेशी यात्रुबारे नयाँ नीति सार्वजनिक गर्दै अर्को सूचना नभएसम्म यही बुधबारदेखि यात्रुहरूलाई सरकारी सुविधा वा सरकारले तोकेको होटेलमा यात्रु स्वयम्ले खर्च व्यहोर्ने गरी क्वारेन्टिनमा बस्नुपर्ने सूचना सार्वजनिक गरेको हो ।
बंगलादेशमा सोमबार अहिलेसम्मकै सबैभन्दा बढी अर्थात् पाँच हजार ४२ व्यक्तिमा कोभिड–१९ संक्रमण पुष्टि भएपछि संक्रमणको नयाँ लहरविरूद्ध नयाँ रणनीति र नियन्त्रणको उपाय सार्वजनिक गरिएको हो ।
बंगलादेशमा सन् २०२० को मार्च ८ मा पहिलो पटक संक्रमण भेटिएपछि महामारी नियन्त्रणका लागि सरकारले लिएको कडा उपायका कारण यो वर्षको सुरूसम्ममा संक्रमण दरमा नियन्त्रण आएपनि पुनः संक्रमण फैलिएपछि सबै सरकारी तथा गैर–सरकारी संघसंस्थाहरूले सावधानीका लागि पहल थालेका बताइएको छ ।
बंगलादेशमा अहिलेसम्म ६ लाख पाँच हजार ९३७ जना व्यक्तिमा कोभिड–१९ संक्रमण पुष्टि भएको छ भने आठ हजार ९९४ संक्रमित व्यक्तिको मृत्यु भएको छ । मङ्गलबार संक्रमित ४५ जनाको मृत्यु भएको सरकारी तथ्याङ्कमा उल्लेख गरिएको छ ।
