भारतको पुणेस्थित कोरोनाविरुद्ध खोप उत्पादक कम्पनी सिरम इन्स्टिच्युट अफ इन्डियामा भीषण आगलागी भएको छ ।
बिहीबार भएको आगलागीबाट पाँच जनाको मृत्यु भएको भारतीय सञ्चारमाध्यमहरुले जनाएका छन् ।
साथै आगलागीबाट हजार करोड भारतीय रुपैयाँ बराबरको आर्थिक क्षति भएको छ ।
आगलागीबाट हजार करोडभन्दा बढीको सम्पत्ति क्षति भएको कम्पनीका कार्यकारी अधिकृत (सिइओ) अदार पुनावालाले जानकारी दिए ।
तर कोरोनाविरुद्धको खोप आपूर्तिमा भने आगलागीले कुनै असर नगरेको उनले बताए ।
पुनावालाले भने, ‘आगलागीबाट भएको क्षतिको असर कोरोनाविरुद्धको खोप उत्पादनमा पर्दैन । हामीले धेरै कारखानाबाट खोप बनाइरहेका छौं ।’
तर बिसिजी इन्जेक्सनको आपूर्ति भने प्रभावित हुनसक्ने उनले बताए ।
यसैबीच कम्पनीले आगालगीमा परी मृत्यु भएका पाँच जनाको परिवारलाई जनही २५ लाख रुपैयाँ सहयोग गर्ने घोषणा गरेको छ ।
