बेलायतले फाइजर र बायोनटेकले संयुक्त रुपमा निर्माण गरेको कोरोना विरुद्धको खोप प्रयोगमा अनुमति दिएको छ ।
९५ प्रतिशत प्रभावकारी सावित भएको दाबी गरिएको ती कम्पनीको कोरोना खोप प्रयोगमा बेलायतले अनुमति दिएको हो ।
बेलायतको मेडिसिन्स एन्ड हेल्थ केयर प्रोडक्ट्स रेगुलेटरी एजेन्सीले फाइजर र बायोनटेकको खोप सुरक्षित भएको बताएको छ ।
यसैबीच, फाइजर र बायोएनटेक कम्पनीले निर्माण गरेको कोरोना भाइरसविरुद्धको खोपलाई प्रयोग गर्ने अनुमित दिने बेलयात विश्वमै पहिलो देश बनेको छ ।
बेलायतले फाइजरको चार करोड डोज खोप मगाइसकेको छ । बिबिसीका अनुसार दुई करोड मानिसलाई यी खोपहरु दुई–दुई डोज दिइने छ ।
खबरअनुसार, बेलायतमा अर्को हप्तादेखि खोप दिइन सुरु गरिने छ । साथै चाँडै यस खोप सामूहिक रुपमा लगाउन सुरु गरिने बेलायती अधिकारीहरुले जानकारी दिएका छन् ।
त्यहाँको सरकारद्वारा जारी विज्ञप्तिमा भनिएको छ, ‘स्वतन्त्र मेडिसिन्स एन्ड हेल्थकेयर प्रोडक्टस रेगुलेटरी एजेन्सी (एमएचआरए) को सिफारिसमा सरकारले फाइजर–बायोएनटेकको कोभिड–१९ को खोपलाई प्रयोगका लागि अनुमित दिएको छ ।’
