अमेरिकी राष्ट्रपति डोनाल्ड ट्रम्पले जो बाइडेनको जित औपचारिक रुपमा सुनिश्चित भए आफूले ह्वाइट हाउस छाड्ने बताएका छन् ।
यद्यपि चुनावी प्रतिस्पर्धा अझै नटुंगिएको उनको जोड थियो ।
चुनावमा धाँधली भएको आरोप लगाउँदै ट्रम्पले हार स्वीकार गर्न मानेका छैनन् ।
बाइडेनले ३०६ इलेक्टोरल मत जितिसकेका छन् । ट्रम्पले मात्र २३२ मत प्राप्त गरेका छन् । ट्रम्पको तुलनामा बाइडेनले ६० लाखबढी लोकप्रिय मत पनि पाएका छन् ।
डिसेम्बर १४ का दिन इलेक्टरले यो निर्वाचनलाई औपचारिकता दिनेछन् ।
ह्वाइट हाउसमा पत्रकारहरुले ट्रम्पलाई प्रश्न गरेका थिए- 'इलेक्टोरल कलेजको मतदानमा हार भए ह्वाइट हाउस छाड्नु हुन्छ कि हुन्न ?'
जवाफमा उनले भने, ‘निश्चय नै छाड्नेछु। तपाईंलाई पनि त्यो कुरा थाहा छ ।’
तर, उनले थपे, ‘यदि तिनले बाइडेनलाई चुने भने त्यो गल्ती हुनेछ ।’
उनले आफूले कहिल्यै हार स्वीकार नगर्ने संकेत पनि गरे ।
‘हार स्वीकार गर्न निकै कठिने हुनेछ, किनभने यहाँ भयंकर धाँधली भएको हामीलाई थाहा छ,’ ट्रम्पले भने ।
