हार नस्विकारेका ट्रम्पले भने, 'अर्को हप्तादेखि नतिजा आउँछ, मैले जित्नेछु'

कात्तिक २५, २०७७

अमेरिकी राष्ट्रपतिको निर्वाचनमा रिपब्लिकन नेता डोनाल्ड ट्रम्प पराजित भइसकेको अमेरिकी संचारमाध्यमले केही दिनयता जानकारी दिइरहेका छन् ।

यद्यपी अमेरिकी राष्ट्रपति ट्रम्पले भने चुनावी हारलाई अझै स्वीकार गरिसकेका छैनन् ।

ट्रम्पले चुनावमा धाँधली भएकाले अदालतमा जाने बताइरहँदा उनले ट्विटरमा मंगलबार भनेका छन्, ‘हामीले चुनावमा ठूलो प्रगति गरिरहेका छौं । आगामी हप्तादेखि परिणामहरु आउन सुरु गर्नेछ । अमेरिकालाई फेरि महान बनाउनेछौं ।’

उनले लगत्तै अर्को ट्विटमा भनेका छन्, ‘हामीले जित्नेछौं ।’ उनले चुनावमा भएको धाँधलीविरुद्ध अदालतमा जाने बताउँदै आएका छन् । उनको वकिलले पनि आफूहरुसँग विभिन्न राज्यमा भएको धाँधलीको प्रमाण आफूहरुसँग भएको र फैसला अदालतले गर्ने बताएका छन् ।

WE ARE MAKING BIG PROGRESS. RESULTS START TO COME IN NEXT WEEK. MAKE AMERICA GREAT AGAIN!
— Donald J. Trump (@realDonaldTrump) November 10, 2020

वैधानिक मतलाई मात्र गन्दा चुनाव आफूले जित्ने ट्रम्पको दाबी छ । यसबीचमा ट्रम्पले गरेको यी ट्विटले ट्रम्पले अदालतमा धाँधलीको विषयलाई उठाउने संकेत गरेको छ ।

यसपटक अमेरिकामा कोरोना भाइरसको प्रकोपका कारण नोभेम्बर ३ अगाडि नै हुलाकी मतमार्फत मतदानको सुविधा प्रदान गरिएको थियो ।

हुलाकी मतदानमा प्राय सबै स्थानमा आफू पछाडि परेपछि ट्रम्पले हालै आफूलाई हुलाकी मत पहिल्यै अविश्वसनीय हुन्छ भन्ने लागेको बताएका थिए ।

डेमोक्रेटिक नेता जो बाइडेनले राष्ट्रपति बन्न आवश्यक इलेक्टोरल कलेज भोट २७० भन्दा बढी नै भोट प्राप्त गरिसकेको अन्तर्राष्ट्रिय संचारमाध्यमले जनाइएका छन् ।