बिहार । कोरोना भाइरस संक्रमणको जोखिमका बीच भारतमा लकडाउन जारी छ ।
लकडाउनका कारण सैलुन, स्पा सबै बन्द गरिएको छ । यसैबीच भारत, बिहारको बांका जिल्लामा एक हजाम (नाई) को हत्या भएको छ ।
अमरपुर थाना क्षेत्रको मैनमा गाउँका दिनेश ठाकुरको कुटपिट गरि हत्या गरिएको हो । उनको शव खेतमा फेला परेको थियो ।
खबरअनुसार, नाईले कपाल-दाह्री काट्न नमानेपछि उनको हत्या भएको हो ।
प्रहरीका अनुसार घटनाका आरोपीको खोजी भइरहेको छ । यो घटना उक्त गाउँको हो, जहाँ पछिल्लो पटक २३ जनाको कोरोना स्याम्पल लिइएको थियो ।
मृतककी श्रीमती मुसादेवीका अनुसार गाउँका केही व्यक्तिले आफ्ना पतिलाई कपाल-दाह्री काट्न भनिरहेका थिए ।
तर लकडाउनका कारण ठाकुरले कसैको पनि कपाल-दाह्री नकाट्ने बताउँदै आएका थिए ।
