नेपाल क्रिकेट संघ क्यानले पुस ११ गतेदेखि प्रधानमन्त्री कप महिला क्रिकेट प्रतियोगिताकाे आयोजना गर्ने भएको छ । दाङको लमही क्रिकेट मैदानमा हुने सो प्रतियागिताका लागि खेलाडी छनोट गर्न क्यानले प्रादेशिक क्रिकेट संघलाई पत्राचार गरेको छ ।
संघले मंसिर २१ गतेसम्म जिल्ला टिम छनोट गर्न भनेको छ । क्यानले महिला टिम छनोटका लागि संघबाट २० हजार रुपैयाँ र एक दर्जन बल उपलब्ध गराउने भएको छ भने यसअघि नै टिम छनोट भएको भए सोही टिमलाई निरन्तरता दिने भनेको छ ।
यस्तै टिम छनौट गर्दा विवादरहित तरिकाले निस्पक्ष रुपमा गर्न भनेको छ । कारोनाको महामारीका बेला हुन लागेको प्रतियोगिताका लागि क्याम्प राख्दा सम्बन्धित जिल्लाको स्थानीय तहबाट स्वीकृति लिन भनेको छ ।
यस्तै प्रधानमन्त्री कप प्रादेशिक प्रतियोगिता २०७७ पुस ७ गतेसम्म सम्पन्न गर्नुपर्ने भनिएको छ । जिल्ला टिम छनौटको बलि भर्पाईसहितको प्रतिबेदन संघमा पेश गरेपछि मात्र अनुदान रकम निकाशा गरिने क्यानले बताएको छ ।
दक्षिण एशियाली खेलकुद सागपछि महिला क्रिकेटको कुनै पनि प्रतियोगिता भएको छैन । अझै पनि आइसीसी र एसीसीले कुनै पनि प्रतियोगिताको मिति एकिन नगर्दा क्यानले महिला टिमको प्रशिक्षण कहिले गर्ने भनेर भनेको छैन । तर अब प्रधानमन्त्री कप महिला क्रिकेटबाट क्यानले महिला खेलाडीलाई ब्यस्त बनाउने योजना बनाएको छ ।
