काठमाडौं । नेपाली स्टार क्रिकेटर सन्दीप लामिछाने बिहीबार (भोलि) बिहान सीपीएलका लागि ट्रिनिडाड एण्ड टोबागो जाने भएका छन्।

उनी बिहीबार बिहान १० बजे कोरियन एयरमार्फत कोरियाको सोल हुँदै प्रस्थान गर्ने लामिछानेका म्यानेजर शिवाकोटीले जनाएका छन । उनका अनुसार उनी त्यहाँबाट अमेरिकाको ट्रान्जिट हुँदै जानेछन् । उनी अगस्ट १ तारिखमा गन्तब्यमा पुग्नेछन् ।

क्यारेबियन प्रिमियर लिग (सीपीएल) मा उनले यसपाला जमैका तहल्लाबाजबाट खेल्नेछन् । जसका लागि उनले १ करोड नेपाली रुपैयाँभन्दा बढी रकम पाउनेछन् ।

लामिछाने त्यहाँ पुगेपछि १५ दिन क्वारेन्टिनमा बस्नेछन्। सीपीएलमा सहभागी हुनु अगाडि नेपालमा उनले मंगलबार कोरोना परिक्षण गराएका थिए । सानेपास्थित स्टार अस्पतालमा कोरोना जाँच गराएका सन्दीपको रिपोर्ट भने आज आउनेछ ।

सन्दीप यो वर्षको सीपीएल जमैका तल्लावाजबाट खेल्नेछन् सीपीएल अगस्ट १५ बाट सेप्टेम्बर १० सम्म हुनेछ । सीपीएलमा जमैकासँगै बार्बेडोस् ट्रिडेन्ट्स, ट्रिनबागो नाइट राइडर्स, गुएना अमेजन वारियर्स, सेन्ट लुसिया जौउक्स र सेन्ट किट्स एण्ड नेभिस प्याट्रिओट्सले प्रतिस्पर्धा गर्नेछन्। सीपीएलमा कुल ३३ खेल हुने छन् । कारोना भाइरसका कारण ती सबै खेल बिना दर्शक खेलाइने छन् ।

सन्दीप तेस्रोपटक सीपीएल खेल्ने तयारीमा छन् । उनले यसअघि सन् २०१८ मा पहिलोपटक सेन्ट किट्स एन्ड नेभिस पेट्रीयट्सबाट खेलेका थिए । त्यसका लागि उनलाई पाँच हजार अमेरिकी डलर पारिश्रमिक दिइएको थियो। उनले सो प्रतियोगितामा पाँच खेलमा सात विकेट लिएका थिए ।

यस्तै, दोस्रो पटक सीपीएल सन्दीपले सन् २०१९ मा बार्बाडोस ट्राइडेन्ट्सबाट खेले । उनले छ खेलमा आठ विकेट लिएका थिए । सन्दीपले गत वर्ष ७० हजार अमेरिकी डलर पारिश्रमिक प्राप्त गरेका थिए ।