अफगानिस्तान सरकारले देशको जेलमा रहेका र त्यहाँको सरकारले रिहा गर्न बाँकी रहेका तालिबानी लडाकूहरूलाई अब रिहा नगर्ने बताएकाे छ ।
अफगानिस्तानका राष्ट्रपति असरफ घानीले केही महिनायतादेखि अफगानिस्तानको जेलमा रहेका तालिबानी लडाकूहरूलाई रिहा गरिरहेका थिए ।
उनले करिब ४ हजार जना तालिबानीहरूलाई रिहा गरिसकेको बताइएको थियो । उनले देशको जेलमा रहेका करिब ५ हजार जना तालिबानहरूलाई रिहा गर्ने जनाएका थिए ।
तर पनि अब यो पछिल्लो लटमा रिहा गर्ने भनिएका करिब ६ सय जना भने गम्भीर खालको अपराधमा संलग्न रहेकाले उनीहरूलाई रिहा नगरिने उनले बताए । अफगानिस्तानमा हिंसा मच्चाइरहेका तालिबानीहरूसँग सरकारले वार्ता गर्ने तयारी गरेको बताइएको छ । त्यसैले सो वार्ताको लागि पूर्वसर्तका रूपमा अफगानिस्तानको जेलमा राखिएका सबै जना आफ्ना सदस्यहरूलाई रिहा गर्नुपर्ने माग तालिबानी संगठनले गरेको छ ।
अमेरिकाले अफगानिस्तानका तालिबानहरूसँग शान्तिवार्ता गर्ने पहल गरेको छ । केही महिनाअघि अमेरिकाले तालिबान र अफगानिस्तानको सरकारका प्रतिनिधिसँग पनि वार्ता गरेको थियो ।
