काठमाडौं । नेकपा एमालेका अध्यक्ष केपी शर्मा ओलीले आइतबारका लागि बोलाएको नेकपा एमाले केन्द्रीय कमिटी बैठक स्थगित भएको छ ।
एमाले केन्द्रीय कार्यालय सचिव शेरबहादुर तामाङका अनुसार भोलि आइतबारका लागि तय भएको बैठक एक दिन पर धकेल्दै सोमवार दिउँसो ३ बजेका लागि बोलाइएको हो ।
एमाले वरिष्ठ नेता माधवकुमार नेपाल पक्षले पार्टी एकताका लागि अध्यक्ष ओलीलाई आइतबार सम्मको समय सीमा दिएको थियो । नेता नेपालले पनि हरेकजसो सार्वजनिक कार्यक्रममा आफू एकताकै पक्षमा रहेको जिकिर गर्दै आएका छन् ।
पार्टी एकतालाई मध्यनजर गर्दै बैठक सारिएको हुनसक्ने एक नेताले जानकारी दिए ।
केन्द्रीय कमिटी बैठकअघि बिहान ११ बजे स्थायी कमिटी बैठक पनि बस्ने भएको छ ।
दुवै बैठक तुलसीलाल स्मृति प्रतिष्ठानको भवन, ललितपुरमा बस्ने तामाङले जानकारी दिए ।
