चैत १६, २०८०, शुक्रबार
               

सुदूरपश्चिम : विश्वासको मत नदिने एमाले प्रदेशसभा सदस्यलाई सोधियो स्पष्टीकरण

नेपाल फ्ल्यास
जेठ २६, २०७८

ADVERTISEMENT

सुदूरपश्चिम । सुदूरपश्चिम प्रदेशका मुख्यमन्त्री त्रिलोचन भट्टलाई विश्वासको मत नदिने नेकपा (एमाले) का प्रदेशसभा सदस्यलाई मंगलबार स्पष्टीकरण सोधिएको छ ।

एमालेको प्रदेश संसदीय दलको बैठकले गरेको निर्णय र ह्विप विपरीत मुख्यमन्त्रीको विपक्षमा मतदान गर्ने सात सदस्यलाई संसदीय दलका नेता प्रकाशबहादुर शाहले २४ घण्टे स्पष्टीकरण सोधेको संसदीय दलका प्रमुख सचेतक दुर्गाकुमारी कामीले बताइन् ।

विपक्षमा मतदान गर्नेमा नेपालु चौधरी, गेल्बुसिंह बोहरा, लीलाधर भट्ट, रतनबहादुर थापा, माया तामाङ, पठानसिंह बोहरा र बलदेव रेग्मी रहेको जनाइएको छ ।

माओवादी केन्द्रको नेतृत्वमा रहेको प्रदेश सरकारका मुख्यमन्त्री पक्षमा संसदीय दलको निर्णयानुसार एमालेका १७ जनाले भने मत दिएका थिए । एमाले स्थायी कमिटी बैठकले प्रदेश सरकारलाई दिएको समर्थन फिर्ता गर्ने निर्णय गरेको थियो ।

प्रदेश एमाले संसदीय दलमा पूर्वनेता माधवकुमार नेपाल पक्षको बहुमत छ । मुख्यमन्त्री भट्ट सत्ता साझेदार दल एमालेमा उत्पन्न आन्तरिक किचलोका बीच सदनबाट विश्वासको मत लिन सफल भएका छन् ।

उनले प्रदेशसभाका ५२ जना सदस्यमध्ये बहुमत अर्थात् ३० मत पाएका छन् । एमालेका सात र राजपाका दुई गरी ९ जनाले विपक्षमा मत दिएका थिए । १२ सदस्य रहेको नेपाली कांग्रेस तटस्थ बसेको थियो ।

प्रदेशसभामा एमालेका सभामुखसहित २५ र माओवादी केन्द्रका १३ जना सदस्य छन् । सरकार गठनको तीन वर्ष पूरा हुँदा मुख्यमन्त्रीले प्रदेशसभामा मंगलबार पहिलो पटक विश्वासको मत लिएका हुन् ।

यो पनि