कठमाडाैं । प्रधानमन्त्री केपी शर्मा ओलीमाथि प्रधानमन्त्री र अध्यक्ष दुवै पद छाड्न दबाब परेको छ ।
अध्यक्ष पुष्पकमल दाहाल प्रचण्ड, वरिष्ठ नेताद्वय झलनाथ खनाल र माधव नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठसहित १८ जना स्थायी कमिटी सदस्यले ओलीले पार्टी र सरकारको नेतृत्व गर्ने नैतिकता गुमाएको टिप्पणी गर्दै यस्तो दबाब दिएका हुन् ।
यसअघि बोलेका अन्य नेताहरुले पनि यसै अभिव्यक्तिसँग मिल्दोजुल्दो अभिव्यक्ति दिएका थिए ।
तर, बैठकमा प्रधानमन्त्री ओलीले सरकारले राम्रो काम गरिरहेको बताउँदै आफ्नो बचाउ गरेको सो बैठकमा सहभागी एक नेताले जानकारी दिए ।
उनले प्रधानमन्त्रीले बैठकमा सरकारको कामको फेहरिस्त सुनाउँदै असन्तुष्टि तथा कुण्ठा पालेका तथा पद नपाएकाले मात्र सरकारको काम नदेखेको प्रतिक्रिया दिएको पनि बताए ।
प्रधानमन्त्री केपी शर्मा ओलीले आइतबार भारत र नेपालकै नेता मिलेर आफूलाई प्रधानमन्त्रीबाट हटाउन खोजिरएको अभिव्यक्ति दिएका थिए ।
जसका कारण उनी नेकपाकै नेता तथा कार्यकर्ताको आलोचनाको केन्द्रबिन्दु बन्दै आएका छन् ।