काठमाडौं । कोरोना भाइरसको संक्रमणको असर देशैपिच्छे फरक फरक देखिएको छ । संक्रमणको तुलनामा सबैभन्दा बढी मृत्यु बेल्जियममा भएको छ ।

विश्वभरको संक्रमणका आधारमा मृत्यु प्रतिशत भने ६ दशमलव ९१ प्रतिशत छ । केही साता अघिसम्म यो १० प्रतिशतसम्म थियो ।

यो सामग्री तयार पार्दासम्म बेल्जियममा ५१ हजार ४२० संक्रमित थिए । त्यहाँ ८ हजार ४१५ जनाको मृत्यु भइसकेको थियो । यो कुल मृत्युको १६ दशमलव २६ प्रतिशत हो ।

नेपाल फ्ल्यासले १५ हजारभन्दा बढी संक्रमित ३१ मुलुक तथ्याङ्क विश्लेषण गर्दा कतारमा सबैभन्दा कम शून्य दशमलव ०६ प्रतिशतको मृत्यु भएको छ । कतारमा १८ हजार ८९० जना संक्रमित भएकोमा १२ जनाको मृत्यु भएको छ ।

एक लाख ७७ हजार १६० जना संक्रमित पुष्टि भइसकेको रसियामा १ हजार ६२५ जनाले ज्यान गुमाएका छन् । यो संक्रमण संख्याको आधारमा ० दशमलव ९१ प्रतिशत हो ।

अति संक्रमित ३१ मुलुकमध्ये एक प्रतिशतभन्दा कम मृत्यु भएका पाँच मुलुकमा कतार, सिंगापुर, बेलारुस, साउदी अरेबिया र रुस हुन् ।

१० प्रतिशतभन्दा बढी मृत्यु सामना गर्ने मुलुकमा बेल्जियमसहित ७ वटा देश छन् । बेलायतमा १५ प्रतिशतको हाराहारी संक्रमितले मृत्युवरण गरेका छन् । त्यहाँ २ लाख १ हजार १०१ जना संक्रमित पुग्दा ३० हजार ७६ जनाको ज्यान गएको छ । यो १४ दशमलव ९५ प्रतिशत हो ।

फ्रान्सको मृत्यु प्रतिशत १४ दशमलव ८१ प्रतिशत छ । त्यसपछि इटालीको १३ दशमलव ८४ प्रतिशत, नेदरल्यान्ड्सको १२ दशमलव ५८ प्रतिशत, स्विडेन  १२ दशमलव २९ प्रतिशत र स्पेन १० दशमलव १९ प्रतिशत छ ।

विश्वको कुल संक्रमितको ३२ प्रतिशतभन्दा बढी र मृत्युको २८ प्रतिशतभन्दा बढी हिस्सा ओगटेको अमेरिका संक्रमणका आधारमा मृत्युको प्रतिशत निकाल्दा १४औँ स्थानमा परेको छ । अमेरिकामा करिब ६ प्रतिशतको मृत्यु भएको छ ।

सार्कका सदस्य मुलुक भारतमा ३ दशमलव ३६ प्रतिशत मृत्यु हुँदा पाकिस्तानमा २ दशमलव ३४ प्रतिशतको ज्यान गएको छ ।

हेर्नुस् ३१ देशमा संक्रमणका आधारमा मृत्यु प्रतिशत

(अहिलेसम्म १५ हजारभन्दा बढी संक्रमित हुने ३१ वटा देश छन् । यहाँ ती मुलुकको मृत्यु प्रतिशतकोमात्र विश्लेषण गरिएको हो ।)