एजेन्सी । सामाजिक सञ्जाल ट्विटरमा एक पोष्ट गरेका युवक प्रहरी खोरसम्म पुगेका छन् ।
भारत, भिवाडीको सांथलकाबाट बिहार निवासी एक युवकले ट्विट गरे ।
बिहारका पूर्व मन्त्री उपेन्द्र कुशवाहालाई सम्बोधन गर्दै उनले 'राशन तथा पैसा नभएपछि १२ जना केही दिनदेखि भोकै रहेको' ट्विट गरे ।
उक्त ट्विट रिट्विट हुँदै सीएमओसम्म पुग्यो । मामला कलेक्टर तथा एसपीसम्म यो खबर पुग्यो ।
राशन सामाग्री लिएर एक टिम युवकले भनेको ठेगानामा गयो । त्यहाँ पुगेर हेर्दा टिमका सदस्यहरु 'अक्क न बक्क' परे ।
युवकको साथमा बियरका खाली १० वटा बोटल र खानेकुरा थिए ।
टिमका सदस्यको प्रश्नपछि युवकले भने, 'साथीसँग शर्त लागेको थियो, त्यसैले मजाकमा ट्विट गरेको थिएँ ।'
त्यसपछि बिहारको पटना जिल्ला निवासी २३ वर्षीय जीतेश र समस्तीपुर निवासी २५ वर्षीय उमेश कुमारलाई प्रहरीले पक्राउ गर्यो ।
उनी सांथलकामा साथीसँग फ्ल्याटमा बस्दै आएका थिए ।
उनले ट्विटमा लेखेका थिए, 'लकडाउनका कारण हामी १२ जना राजस्थानको भिवाडीमा फसिरहेका छौं । कृपया सहयोग गर्नुहोस् ।'
