नेपाल एपिएफ क्लबले साविक विजेता नेपाल पुलिस क्लबलाई हराउँदै प्रधानमन्त्री कप एकदिवसिय क्रिकेट प्रतियोगिताको फाइनलमा स्थान बनाएकाे छ । 

बुधबार पहिलो सेमिफाइनलमा एपिएफले पुलिसलाई ३० रनले हराउँदै दोस्रो पटक फाइनलमा स्थान बनाएको छ । जितको लागि २०४ रनको विजयी लक्ष्य पछ्याएको पुलिस ४९.२ ओभरमा १७३ रनमा अल आउट भयो । 

एपिएफ समूह ए मा अपराजित रहँदै सेमिफाइनलमा पुगेको थियो । एपिएफले यसअघि दोस्रो संस्करणको उपाधि जितेको थियो । दोस्रो सेमिफाइनलमा बिहीबार समूह बी को विजेता बागमती प्रदेश र समूह एको उपविजेता त्रिभुवन आर्मी क्लबबीच प्रतिस्पर्धा हुने छ । फाइनल शनिबार हुनेछ ।