खोटाङ । भारी वर्षाका कारण घर भत्किएपछि विचल्नीमा परेका साकेला गाउँपालिका–१ बाँझेच्यानडाँडाका ७३ वर्षीय मानबहादुर खत्री र उनकी ७१ वर्षीया श्रीमती छलिमायाँ खत्रीका लागि स्थानीय बासिन्दाले चन्दा उठाएरै नयाँ घर निर्माण गरिदिएका छन् ।
गत असार ३२ गते राति परेको भारी वर्षाका कारण घर भत्किएपछि विचल्लीमा परेका खत्री दम्पत्तीको घर पुनःनिर्माणका लागि आफन्त तथा शुभेच्छुकले चन्दा संकलन गरेर दुईतले नयाँ घर निर्माण गरिदिएका हुन् ।
स्थानीय अभियानकर्मी थिरेन्द्र भट्टराई, बमबहादुर खत्री र सन्तोष केसीको पहलमा चन्दा संकलन अभियान सञ्चालन गरेर प्राकृतिक प्रकोप पीडित खत्री दम्पतीलाई भूकम्प प्रतिरोधक नयाँ घर निर्माण गरिदिएको जनाइएको छ । अभियानका क्रममा खत्री दम्पतीको घर पुनः नर्माणका लागि स्वदेश तथा विदेशबाट तीन लाख ६० हजार ८६२ रुपैयाँ संकलन भएको थियो ।
घर निर्माणका लागि संकलन भएकामध्ये तीन लाख २१ हजार ७०८ रुपैयाँ मै खत्री दम्पतीको नयाँ घर ठडिएको अभियानकर्मी भट्टराईले बताए । घर भत्किएपछि आवासविहीन बनेर अरुको घरमा बस्दै आएका खत्री दम्पती स्थानीय बासिन्दाले बनाइदिएका नयाँ घरमा हिन्दु परम्पराअनुसार भित्रिएका छन् ।
स्थानीय बासिन्दाले वर्षा याममा पहिरोले बस्नै नमिल्ने अवस्थामा पुगेको खत्री दम्पतीको घरको सट्टा भूकम्प पुनःनिर्माण प्राधिकरणको शैलीमा नयाँ घर निर्माण गरिदिएका छन् । एक मात्र छोरीले विवाह गरेपछि घरमा वृद्ध दम्पती मात्र बसिरहेका छन् ।
खत्री दम्पतीको दयनीय अवस्था देखेर आफन्तले घर पुनःनिर्माणका लागि स्वदेश तथा विदेशमा सहयोग अभियान सञ्चालन गरेका थिए । पहिरो पीडित दम्पतीको घर पुनःनिर्माणका लागि साकेला गाउँपालिकाले पनि १५ हजार रुपैयाँ आर्थिक सहयोग गरेको गाउँपालिका प्रमुख अर्जुनकुमार खड्का ‘झङ्कार’ले बताए ।
अभियानमा हाल यूकेमा रहनुभएकी समाजसेवी ईशा गुरुङले तीज मनाउने खर्च कटाएर वृद्धवृद्धाको घर बनाउन २० हजार रुपैयाँ, दाहाल बन्धुले सञ्चालन गरेको अभियानबाट २० हजार, संयुक्त आवाज परिवर्तन समाज नेपालले १७ हजार १५५, दाहाल प्रतिष्ठान शाखा खोटाङले १० हजार र दाहाल प्रतिष्ठान प्रारम्भिक समिति निर्मलीडाँडाले आठ हजार रुपैयाँ सहयोग गरेको थियो । स्थानीय बासिन्दाले चन्दा संकलन गरेर नयाँ घर निर्माण गरिदिएपछि खत्री दम्पती हर्षित बनेका छन् ।
खत्री दम्पतीको घर निर्माण गरेपछि बाँकी रहेको रकम साकेला गाउँपालिका–१ बाँझेच्यानडाडाँकै ब्रेनहेमरेज पीडित जीतेन्द्रप्रसाद खत्रीलाई हस्तान्तरण गर्ने तयारी गरिएको छ । घर पुनः निर्माणका क्रममा बाँकी रहेको ३९ हजार १५४ रुपैयाँमा अन्य रकम थप गरेर ब्रेनहेमरेज पीडित खत्रीलाई उपचार सहयोगस्वरुप प्रदान गर्ने तयारी गरिएको अभियानकर्मी भट्टराईले बताए ।
ब्रेनहेमरेज पीडित खत्रीको विगत पाँच महिना अगाडिदेखि काठमाडौंस्थित मोडेल अस्पतालमा उपचार भइरहेको छ । कमजोर आर्थिक अवस्थाका पीडित खत्रीको उपचारमा आर्थिक अभाव भएपछि थप उपचारमा समस्या भएको आफन्तले बताएका छन् ।
