काठमाडौं । नेपाल कम्युनिष्ट पार्टी (नेकपा) का नेता तथा पूर्वमन्त्री भीम रावलले प्रधानमन्त्री केपी शर्मा ओली र रअका प्रमुख सामन्तकुमार गोयलको भेटलाई आपत्ति जनाएका छन् ।
प्रधानमन्त्रीका प्रेस सल्लाहकारले ओली र गोयलबीच भेट भएको पुष्टि गरेलगत्तै नेता रावलले ट्विटमार्फत सो आपत्ति जनाएका हुन्।
उनले ट्विटमा प्रधानमन्त्री केपी शर्मा ओली र रअ प्रमुखबीच भेट हुनु आपत्तिजनक र कूटनीतिक मर्यादाविपरीत भएको बताएका छन् ।
‘नेपालको संविधानद्वारा निर्देशित परराष्ट्र नीति, स्वाधीनता र स्वाभिमान तथा सरकारको नेतृत्व गरिरहेको नेकपाको विचार, नीति र घोषणाको विपरीत भारतीय गुप्तचर रअ प्रमुखसंग नेपालका प्रधानमन्त्रीको जसरी वार्ता भयो र जस्तो समय र तरिकाले भ्रमण गराइयो यो आपत्तिजनक छ’ उनको ट्विटमा भनिएको छ, ‘कुटनीतिक मर्यादा विपरीत छ ।’
नेपालको संविधानद्वारा निर्देशित परराष्ट्र नीति, स्वाधीनता र स्वाभिमान तथा सरकारको नेतृत्व गरिरहेको नेकपाको विचार,नीति र घोषणाको विपरीत भारतीय गुप्तचर रअ प्रमुखसंग नेपालका प्रधानमन्त्रीको जसरी वार्ता भयो र जस्तो समय र तरिकाले भ्रमण गराइयो यो आपत्तिजनक छ।कूटनीतिक मर्यादा विपरीत छ।
— Bhim Rawal, PhD (@BhimRawal179) October 22, 2020
पूर्वप्रधानमन्त्रीहरू शेरबहादुर देउवा, पुष्पकमल दाहाल प्रचण्ड र माधवकुमार नेपालले भने सचिवालयमार्फत गोयलसँग भेटघाट नभएको बताइसकेका छन् ।
रअ प्रमुख गोयल बुधबार आफ्नै विमानमार्फत ११ जनाको टोलीसहित नेपाल आएका थिए । उनी बिहीबार भारत फर्किएका छन् । उनी भारत फर्किएलगत्तै नेपालमा उनीको गोप्य भ्रमणबारे निकै चासो दिइएको छ । यद्यपि उनी बिना जानकारी नेपाल आएका थिए ।
रअ प्रमुखसँग सत्तारुढ दल र प्रमुख प्रतिपक्षी नेपाली कांग्रेसका सभापति देउवाको पनि भेट भएको भनी प्रचार भएसँगै उनीहरुले रअ प्रमुखसँग आफ्नो भेट नभएको भनी स्पष्टीकरण दिएका छन् ।
