प्रधानमन्त्री एवम् नेकपा अध्यक्ष केपी शर्मा ओलीले पार्टीको विवाद समाधानका लागि सचिवालय बैठक गर्ने प्रस्ताव गरेका छन् । उपाध्यक्ष वामदेव गौतमलाई आफ्नो पक्षमा ल्याएर बहुमत जुटाउन सफल भएका ओलीले जारी स्थायी कमिटी बैठक रोकेर सचिवालय बैठक बोलाउने प्रस्ताव अर्को अध्यक्ष पुष्पकमल दाहाल ‘प्रचण्ड’सँग गरेका हुन् । प्रधानमन्त्री निवास बालुवाटारमा सोमबार भएको छलफलमा ओलीले यस्तो प्रस्ताव राखेका हुन् ।
सोमबारको छलफलमा वरिष्ठ नेता झलनाथ खनाल र स्थायी कमिटी सदस्य सुवास नेम्वाङ पनि सहभागी थिए । आइतबार पनि प्रधानमन्त्री ओलीले सचिवालय बैठककै प्रस्ताव गरेका थिए । अर्का अध्यक्ष प्रचण्ड र वरिष्ठ नेता खनालले भने स्थायी कमिटीबाटै समस्याको समाधान खोजिनुपर्ने जवाफ दिएका छन् । ‘विवाद जहाँको त्यहीँ छ, अब फेरि सचिवालय बैठक बस्ने कि स्थायी कमिटी भन्नेमै विवाद छ ’ एक नेताले भने ।
सचिवालयमा आफ्ना पक्षमा बहुमत नपुग्ने भएपछि यसअघि ओली आफैले बैठक लगातार स्थगित गर्दै आएका थिए । अहिले उपाध्यक्ष गौतम आफ्नो पक्षमा आएर समीकरण बदलिएपछि ओलीले आफुअनुकुल बनाउन प्रयासरत छन् । अहिलेसम्म शीर्ष नेताको बैठकमा कुनै सहमति ननिस्किएपछि मङ्गलबार फेरि बैठक बस्ने सहमति भएको छ ।
पछिल्लो समय प्रधानमन्त्री ओली सचिवालय बैठकका पक्षमा छन् भने प्रचण्ड स्थायी कमिटी बैठक बोलाउनुपर्ने अडानमा छन् । गत साउन १३ गते प्रधानमन्त्रीले एकतर्फी रूपमा स्थायी कमिटी बैठक स्थगित गरेका थिए । तर, प्रचण्डले स्थायी कमिटी बैठकको अध्यक्षता गर्दै बैठक चलाएका थिए । २९ जना सहभागी स्थायी कमिटी बैठकमा वरिष्ठ नेता खनाल र माधव नेपाल पनि सहभागी थिए ।
