प्रधानमन्त्री केपी शर्मा ओलीलाई पदबाट राजीनामा गराउन महिना दिनयता भईहेको प्रयास तत्काललाई रोकिएको छ । सत्तारुढ दल नेपाल कम्युनिस्ट पार्टी (नेकपा)को आन्तरिक विवादमा पार्टी अध्यक्ष तथा प्रधानमन्त्री दुवै पदबाट राजीनामा दिन गरिएको दबाब केन्द्रीय समिति बैठक अघिसम्मलाई रोकिएको नेताहरूको दाबी छ ।
आन्तरिक विवादका कारण दुई साता रोकिएको पार्टीको स्थायी कमिटी बैठक शुक्रवार बस्दै छ । पछिल्लो पटक सहमतिका लागि भन्दै एक साता बैठक धकेलिए पनि कुनै निष्कर्ष भने निस्कन सकेन । शुक्रवारको बैठक पनि दिउँसोसम्म सारेर दुई अध्यक्ष छलफलमा छन् । अहिलेसम्म विवाद नमिलेकाले अब केन्द्रीय समितिमा लगेर छलफल गरिने नेताहरूले बताएका छन् ।
स्थायी कमिटी बैठक केही नेताहरूले बोलेर शक्रुबारै स्थगन गर्ने तयारी अध्यक्ष पुष्पकमल दाहाल प्रचण्ड र नेता माधवकुमार नेपाल पक्षले गरेको छ । तत्काल समाधान नभएपछि सहमतिको विकल्प खोज्न नेताहरूले थप समय लिने भएका स्थायी कमिटी सदस्य गणेश साह बताउँछन् ।
केन्द्रीय कमिटी बैठक बस्ने भएकाले शुक्रबारका लागि निर्धारित स्थायी कमिटी बैठक औपचारिकताका लागि मात्र बस्ने जनाइएको छ । साहले भने ‘अहिलेकै विषयमा छलफल गर्ने गरी केन्द्रीय कमिटी बैठक बोलाउने तयारी छ , सायद शुक्रवारको बैठकले मिति तय गर्ने छ । पार्टीमा जे–जे निर्णय लिनुपर्ने हो अब केन्द्रीय कमिटीले गर्नेछ ।’ विवाद केन्द्रीय समिति पुर्याउने तयारीसँगै ओलीको राजीनामाको विषय तत्कालका लागि टरेको नेताहरू बताउँछन् ।
बिहीबार प्रधानमन्त्री निवासमा भएको छलफले निकास दिन नसकेपछि बेलुकी खुमलटारमा भेला भएका प्रचण्ड-नेपाल पक्ष उक्त निष्कर्षमा पुगेको नेताहरु बताउँछन् । शुक्रवार स्थायी कमिटी बैठक केही समय पर सारेर दुई अध्यक्षले छलफल गरेका छन् ।
असार १० गतेदेखि सुरु भएको स्थायी कमिटी बैठकमा अध्यक्ष प्रचण्डसहित वरिष्ठ नेता नेपाल, झलनाथ खनाल, उपाध्यक्ष वामदेव गौतम लगायत अधिकांश स्थायी कमिटी सदस्यहरूले ओलीको राजीनामा मागेका थिए । तर, ओली अध्यक्ष र प्रधानमन्त्री दुवै पद नछोड्ने अडानमा छन् ।
स्थायी कमिटी बैठक जारी रहदाँ प्रधानमन्त्री ओलीले असार १४ मा आफ्नो सरकार हटाउन भारतीय चलखेल भएको भन्ने अभिव्यक्ति दिए । त्यसपछि नेकपा बैठकमा उनको राजीनामाको माग झनै बलियोसँग उठ्यो । त्यसपछि विवाद उत्कर्षमा पुग्यो । विवाद झन् चर्किने भएपछि गत असार २४ गते बोलाइएको स्थायी कमिटी बैठक सहमतिका लागि एक साता रोकिएको थियो । सहमतिका लागि भन्दै बिहीबारको भेटमा पनि प्रचण्ड र नेपालले प्रधानमन्त्री पदबाट राजीनामा दिन भनेका थिए । ओलीले राजीनामा नदिने र स्थायी कमिटी फेस गर्न तयार रहेको जवाफ दिएका थिए ।
ओलीले राजीनामा नदिने बताएपछि बहुमतको निर्णयबाट पनि पार्टीमा नेपाल र प्रचण्ड पक्षले हटाउन सकेका छैनन् । त्यो गर्दा ओलीले फुटाउन सक्ने भन्दै सहमतिको प्रयास भइरहेको छ। दुई पक्षबिच समझदारी खोज्न भन्दै स्थायी कमिटी बैठक रोकेर छलफल थालिएको थियो । पटक-पटक सारिएको बैठक गत शुक्रवार भने देशभर भइरहेको बाढी पहिरोको निहुँ पार्दै स्थगित गरिएको थियो ।