काठमाडाैं । सप्तरीमा पूर्वएमाले धारका नेकपाका नेता तथा कार्यकर्ताले निकालेको प्रदर्शनलाई पूर्वमाओवादीका नेता तथा कार्यकर्ताले अवरोध गरेका छन् ।
तत्कालीन नेकपा एमाले पक्षधर नेता सुखराम यादव, अशोक यादव, अखिलेश झा, दुर्गानन्द ठाकुर लगायतका कार्यकर्ताले स्थानीय शिव मन्दिर प्राङ्गणबाट प्रधानमन्त्री ओलीको समर्थनमा जुलुस निकाल्ने तयारी भइरहँदा पूर्वमाओवादीका नेता उमेश यादव र उनका समर्थकहरु आएर जुलुस निकाल्न अवरोध गरेका हुन् ।
जसका कारण शिवमन्दिर प्राङ्गण तनावपूर्ण बनेको थियो ।
पूर्वएमालेका नेता तथा कार्यकर्ताले प्रदर्शनको तयारी गरिरहँदा पूर्वमओवादीका नेता उमेश यादवले पार्टीको विवादबारे स्थायी कमिटिमा छलफल भइरहँदा कसैको समर्थन या विरोधमा जुलुस प्रदर्शन गर्न नहुने बताए ।
तर, काठमाडाैंमा भने बुधबार प्रधानमन्त्रीको पक्षमा प्रदर्शन गरेका छन् । जुन प्रदर्शनका सम्बन्धमा नेकपा निकटस्थ भनी चिनिने दिल निशानीले भने प्रधानमन्त्रीको पक्षमा निस्केको जमात भन्दा बढी आफू भृकुटीमण्डपमा चिया खाँदा उपस्थित हुने बताएका छन् । उनले बुधबार ट्विट गर्दै उनले यस्तो बताएका हुन् ।
